ALASKË– Incidentet e avionëve në ajër po ndodhinçdo ditë e më tepër. Mediat e huaja kanë raportuar se një avion që transportonte 10 persona në Norton Sound të Alaskës në jug të Rrethit Arktik është zhdukur.
Mësohet se avioni po shkonte nga Unalakleet në Nome me nëntë pasagjerë dhe një pilot, sipas Departamentit të Sigurisë Publike të Alaskës. Ndërkohë raportohet se autoritetet po punojnë për të përcaktuar koordinatat e fundit.
Unalakleet është një komunitet me rreth 690 njerëz në Alaskën perëndimore, rreth 150 milje (rreth 240 kilometra) në juglindje të Nome dhe 395 milje (rreth 640 kilometra) në veriperëndim të Anchorage.
Zhdukja shënon incidentin e tretë të madh në aviacionin amerikan në tetë ditë. Një avion komercial dhe një helikopter i ushtrisë u përplasën pranë kryeqytetit të vendit më 29 janar, duke vrarë 67 persona. Një aeroplan transporti mjekësor u rrëzua në Filadelfia më 31 janar, duke vrarë gjashtë personat në bord dhe një person tjetër në tokë.
Caravan Cessna u largua nga Unalakleet në orën 14:37 dhe zyrtarët humbën kontaktin me të më pak se një orë më vonë, sipas David Olson, drejtor i operacioneve për Bering Air. Aeroplani ishte 12 milje (rreth 19 kilometra) në det të hapur, sipas Rojës Bregdetare të SHBA.
“Stafi në Bering Air po punon shumë për të mbledhur detaje, për të marrë ndihmën emergjente, për të vazhduar kërkimin dhe shpëtimin.”- tha Olson.
Bering Air shërben 32 fshatra në Alaskën perëndimore nga qendrat në Nome, Kotzebue dhe Unalakleet. Shumica e destinacioneve marrin fluturime të planifikuara dy herë në ditë nga e hëna deri të shtunën.
Aeroplanët janë shpesh alternativa e vetme për të udhëtuar në çdo distancë në Alaskën rurale, veçanërisht në dimër./TheGuardian/Radar.al