Autoriteti Kombëtar i Ushqimit i Shqipërisë reagon për rastin e akulloreve me përberës të rrezikshëm që morën vëmendje ditën e djeshme nga Kryetari i Kontrollit të Lartë të Shtetit, Arben Shehu.
Shehu përmendi rastin e auditimit nga AKU në vitin 2021 për një sasi akulloresh “të dëmshme” për të cilat, sipas tij, AKU nuk kishte marrë asnjë veprim.
Një ditë më herët më 16 korrik 2024, kreu i KLSH-së deklaroi se AKU u njoftua menjëherë nga sistemi europian RASFF, por nuk kreu asnjë veprim për ta bllokuar produktin në fjalë.
Nga ana tjetër AKU i Shqipërisë, u shpreh se u kryen verifikime dhe inspektime në operatorët e biznesit ushqimor.
“- Me marrjen e njoftimit, AKU kryen verifikimet e sasisë të importuar për lotet respektive të evidentuara në njoftim, si dhe kreu inspektimin në këto Operatorë të Biznesit Ushqimor me qëllim ndjekjen e gjurmueshmërisë së produktit dhe tërheqjen nga tregu dhe asgjësimin e tij.
– Importet për këtë produkt sipas loteve të përcaktuara nga sistemi RASFF janë kryer gjatë periudhës nga data 01.03.2021 deri me 22.05.2021 (data para daljes së njoftimit nga sistemi RASFF me datë 31.07.2021)” njofton në rrjetin social Facebook, AKU.