Një 39-vjeçar ka humbur jetën si pasojë e një aksidenti të rëndë rrugor në Lushnjë. Ngjarja ndodhi në fshatin Çermë Shkumbin, në aksin rrugor Çermë-Divjakë, ku dy automjete u përplasën kokë më kokë.
Në aksident u përfshinë një automjet tip “BMW” dhe një “Opel”. Si pasojë e përplasjes humbi jetën 39-vjeçari Barjam Kacani, i cili udhëtonte me automjetin “Opel”.
Ndërkohë, pesë persona të tjerë që ndodheshin në automjetin “BMW” mbetën të plagosur, mes tyre edhe tre fëmijë. Sipas burimeve nga Spitali i Lushnjës, të miturit janë jashtë rrezikut për jetën.
Barjam Kacani, baba i tre fëmijëve, ndërroi jetë si pasojë e plagëve të marra në aksident.
Grupi hetimor, nën drejtimin e Prokurorisë, vijon punën për zbardhjen e plotë të rrethanave dhe shkaqeve të aksidentit.