Një aksident i rëndë me pasojë tre viktima shqiptare ka ndodhur mesditën e sotme në autostradën Egnatia Odos, pranë Komotinisë në lindje të Greqisë.
Sipas mediave greke, ngjarja ndodhi pak para stacionit të pagesës në Iasmos, kur një kamion, për arsye ende të paqarta, nuk arriti të frenonte dhe u përplas me dy automjete që kishin ulur shpejtësinë. Përplasja ishte fatale: një prej makinave shpërtheu në flakë brenda pak sekondash.
Në këtë mjet ndodheshin katër shtetas shqiptarë: një burrë 59-vjeçar, një 61-vjeçar, një grua 57-vjeçare dhe një 49-vjeçare. Tre të parët humbën jetën tragjikisht pasi u përfshinë nga flakët, ndërsa gruaja 49-vjeçare arriti të dilte vetë nga makina dhe i shpëtoi vdekjes.
Mjeti tjetër i përfshirë në aksident mbante katër shtetas grekë nga Athina: shoferin 36-vjeçar, një pasagjer 28-vjeçar dhe dy fëmijë të vegjël, 4 dhe 5 vjeç, të cilët u dërguan në spitalin e Komotinisë me lëndime të lehta.
Ndërkohë, shoferi bullgar i kamionit është plagosur rëndë dhe ndodhet nën kujdesin e mjekëve. Zjarri i fuqishëm që shpërtheu pas përplasjes përfshiu jo vetëm mjetet, por edhe zonat përreth autostradës.