Një aksident i rëndë ka ndodhur së fundmi në autostradën A1 pranë Newcastle, në Britaninë e Madhe.
Mediat e huaja raportojnë se katër makina policie dhe dy automjete civile, një BMW dhe një Volvo janë përplasur kokë më kokë.
Për rrjedhojë të aksidentit janë plagosur shtatë efektivë të cilët u dërguan menjëherë me urgjencë në spital.
Në vendngjarje mbërritën pesë ekipe ambulancash, një mjek specialist, një oficer detyre, dy ekipe të Ndërhyrjes në Zona të Rrezikshme (HART) si dhe mbështetje nga Shërbimi Ajror i Ambulancës së Madhe të Veriut.
Pamjet nga vendngjarja të publikuara në rrjet tregojnë momentin e shkatërrimit të madh të një prej makinave të policisë, e cila humbi pjesën e sipërme dhe tre dyer.
Ndërsa automjetet e përfshira në këtë aksident mësohet se janë me dritare të thyera dhe pjesë të shpërndara në të tri korsitë e rrugës.
Një nga automjetet civile është përmbysur plotësisht, ndërsa autostrada A1 është mbyllur në të dy drejtimet midis nyjeve 73 dhe 75 dhe pritet të qëndrojë e tillë edhe për pak çaste pasi po vijojnë hetimet në lidhje me ngjarjen.
