Administrata amerikane është gjithnjë e më e acaruar me mënyrën e veprimit të kryeministrit izraelit Benjamin Netanyahu, pas sulmeve të fundit në Siri dhe bombardimit të Kishës Katolike të Familjes së Shenjtë në Gaza.
Sipas një raporti të publikuar nga Axios, që citon disa zyrtarë të lartë amerikanë, tensionet mes Uashingtonit dhe Tel Avivit janë shtuar ndjeshëm. Një zyrtar i lartë, duke folur në kushte anonimiteti, është shprehur:
“Bibi po sillet si i çmendur. Ai po bombardon gjithçka pa ndërprerje. Kjo po rrezikon gjithçka që Presidenti Trump po përpiqet të ndërtojë në rajon.”
Një tjetër zyrtar përmendi posaçërisht bombardimin e kishës në Gaza, ngjarje që sipas tij ka nxitur një telefonatë të drejtpërdrejtë nga Presidenti Trump drejt Netanyahut për të kërkuar shpjegime.
“Ndjesia është se çdo ditë ka një incident të ri. Po shkojmë drejt një pike pa kthim. Çfarë po ndodh?” – citohet të ketë thënë zyrtari.
Sipas burimeve të Axios, skepticizmi brenda administratës amerikane ndaj Netanyahut është në rritje. Një zyrtar i tretë deklaroi:
“Ka ndjesinë që gishti i tij është gjithmonë në këmbëz. Ai sillet në mënyrë të paqëndrueshme, si një fëmijë që nuk di si të sillet.”
Raporti i Axios vjen në një moment kritik të zhvillimeve në Lindjen e Mesme, ku SHBA ka përpjekur të mbajë një rol balancues mes mbështetjes ndaj Izraelit dhe menaxhimit të krizës humanitare në Gaza. Retorika e përdorur tregon tensione të brendshme të forta mes aleatëve tradicionalë.