Aeroporti i Vlorës, një nga projektet më të mëdha infrastrukturore të viteve të fundit, vijon të mbetet i bllokuar për shkak të një konflikti gjyqësor mes aksionerëve të shoqërisë koncesionare. Kjo situatë lë të pasigurt hapjen dhe nisjen e operimit të tij.
Në qendër të përplasjes janë dy ortakët: MABCO, që pretendon të zotërojë 98% të aksioneve, dhe 2A Group, me 2%. Konflikti ka nisur mbi një pretendim për kontratë shitjeje të 47% të aksioneve nga aksioneri mazhoritar tek aksioneri minoritar, të cilën MABCO e mohon, duke deklaruar se firma e Behgjet Pacollit në këtë dokument është e falsifikuar.
Çështja ka kaluar në disa shkallë gjykimi:
Gjykata e Shkallës së Parë i dha të drejtë aksionerit të vogël.
Gjykata e Apelit rrëzoi këtë vendim, duke i dhënë të drejtë aksionerit mazhoritar.
Megjithatë, një vendim sigurie pezullon përkohësisht veprimet e MABCO-së, duke e përjashtuar nga vendimmarrja në shoqëri.
Si pasojë, certifikimi dhe funksionalizimi i aeroportit mbeten të bllokuar. Ornela Çuçi, nga zyra e komunikimit e Mabetex Group, deklaroi:
“Kërkojmë një auditim ndërkombëtar dhe një zgjidhje të shpejtë ligjore, pasi situata po dëmton rëndë projektin.”
Sipas kontratës koncesionare, aeroporti duhej të ndërtohej brenda 36 muajsh dhe pritej të përfundonte këtë pranverë. Nëse mosmarrëveshja ligjore vazhdon, kompania paralajmëron nisjen e procedurave në arbitrazh ndërkombëtar, duke iu referuar marrëveshjeve për mbrojtjen e investimeve të huaja.
Për momentin, Aeroporti i Vlorës, projektuar si një pikë kyçe për zhvillimin e turizmit dhe ekonomisë së Jugut, mbetet peng i betejave ligjore, me pasiguri për afatet reale të hapjes dhe funksionimit.