Apple ka ngritur një padi ndaj kompanisë së inteligjencës artificiale OpenAI, duke e akuzuar se ka përdorur sekrete tregtare të saj përmes ish-punonjësve që janë larguar për t’iu bashkuar kompanisë që qëndron pas ChatGPT.
Padia është depozituar në një gjykatë federale në Kaliforni, ku Apple pretendon se OpenAI ka nxitur punonjësit që po rekrutonte nga kompania të ndanin informacione konfidenciale dhe madje t’i udhëzonte se si të shmangnin kontrollet gjatë kalimit në kompaninë rivale.
“Ky rast ka të bëjë me ish-punonjësit e Apple që kanë marrë sekrete tregtare të kompanisë për përfitimin e OpenAI”, thuhet në dokumentet e padisë, sipas Apple.
Në procesin gjyqësor janë përfshirë edhe dy ish-punonjës të Apple, të cilët aktualisht punojnë për OpenAI.
Njëri prej tyre është Tang Tan, ish-dizajner i Apple që ka kontribuar në zhvillimin e produkteve si iPhone, Apple Watch dhe iPod, dhe që tani mban postin e drejtuesit të sektorit të pajisjeve harduerike në OpenAI.
I dyti është Chang Liu, ish-inxhinier elektronik i Apple, për të cilin kompania pretendon se kishte akses në disa nga projektet më të ndjeshme të zhvillimit të produkteve përpara se të largohej dhe t’i bashkohej OpenAI.
Nga ana tjetër, OpenAI ka reaguar duke thënë se është duke shqyrtuar padinë dhe ka mohuar çdo interes për sekretet tregtare të kompanive të tjera.
“Ne nuk kemi asnjë interes për sekretet tregtare të kompanive të tjera. Jemi të fokusuar në ndërtimin e teknologjive inovative që fuqizojnë njerëzit në mbarë botën”, deklaroi zëdhënësi i OpenAI, Drew Pusateri.
Padia shënon një përplasje të re mes dy gjigantëve të teknologjisë, të cilët më parë kishin bashkëpunuar për integrimin e ChatGPT në disa shërbime të Apple, por që tashmë po përballen me një konkurrencë të drejtpërdrejtë në garën për zhvillimin e teknologjive të reja të inteligjencës artificiale.