Lagjja “Little Albania” në Bronx është përfshirë në hartën zyrtare të enklavave të emigrantëve në New York, të publikuar nga administrata e kryebashkiakut Zohran Mamdani. Vendimi ka ngjallur reagime, pasi në hartë mungon “Little Italy”, një nga lagjet më të njohura historike të qytetit.
Harta identifikon 30 zona në pesë bashkitë e New York-ut që njihen për praninë historike ose aktuale të komuniteteve emigrante. Mes tyre renditet edhe “Little Albania”, në Bronx, ku prej dekadash është vendosur një nga komunitetet më të mëdha shqiptare në qytet.
Megjithatë, publikimi i hartës ka nxitur kritika nga përfaqësues të komunitetit italo-amerikan, të cilët e kanë cilësuar mungesën e “Little Italy” si një neglizhencë ndaj trashëgimisë historike dhe kulturore të emigrantëve italianë në New York. Sipas tyre, kontributi i këtij komuniteti në zhvillimin e qytetit nuk duhet të lihet jashtë një harte që synon të pasqyrojë historinë e emigracionit.
Pas polemikave, kryebashkiaku Zohran Mamdani deklaroi se harta nuk është një listë përfundimtare dhe se administrata e tij do ta përditësojë atë, duke shtuar edhe komunitete të tjera, përfshirë “Little Italy”.
Pavarësisht debatit, “Little Albania” mbetet pjesë e hartës zyrtare së bashku me zona të tjera të njohura si Koreatown, Chinatown, Little Ukraine, Little Guyana, Little Pakistan dhe Little Yemen. Sipas Bashkisë së New York-ut, projekti synon të evidentojë lagjet që janë identifikuar ndër vite me komunitete të ndryshme emigrantësh dhe nuk përfaqëson një listë të plotë të të gjitha enklavave etnike të qytetit.