Hetimet për dhunimin e një 17-vjeçareje në Fier kanë nxjerrë në dritë të dhëna të reja, ku dyshohet se vajzat e përfshira kishin ngritur një skemë shantazhi dhe gjobëvënieje ndaj personave të ndryshëm.
Sipas burimeve nga grupi hetimor, adoleshentet dyshohet se përdornin një skemë të bazuar në joshje dhe krijimin e situatave komprometuese. Më pas, viktimat dyshohet se fotografoheshin në ambiente hoteli nga persona të tjerë të përfshirë në skemë, me qëllim përdorimin e pamjeve për presion dhe përfitime financiare.
Në kuadër të hetimeve është zbuluar se një prej personave të përfshirë në këtë skemë dyshohet se ka tentuar të përfshijë edhe një punonjës policie. Sipas të dhënave paraprake, një 15-vjeçare e kishte kontaktuar efektivin duke i kërkuar një takim në hotel, por ai ka pranuar ta takojë vetëm në një ambient publik.
Megjithatë, bisedat e zhvilluara në rrjetet sociale dyshohet se janë përdorur më pas për ta vënë nën presion efektivin, me pretendimin se do të publikoheshin komunikimet në internet nëse nuk ndihmonte për mbylljen e çështjes së dhunës ndaj të miturës.
Si pasojë e këtij rasti, punonjësi i policisë është përjashtuar nga radhët e Policisë së Shtetit, ndërsa Agjencia e Mbikëqyrjes Policore (AMP) vijon verifikimet për të sqaruar të gjitha rrethanat.
Ndërkohë, Gjykata e Fierit ka ndryshuar masat e sigurisë për tre vajzat e arrestuara në lidhje me ngjarjen. Për 19-vjeçaren është caktuar masa “Arrest në burg”, ndërsa për njërën prej 15-vjeçareve është vendosur “Arrest në shtëpi”.
Për të miturën tjetër 15-vjeçare është caktuar masa e mjekimit të detyruar spitalor, pasi ekspertiza psikiatrike ka evidentuar probleme të shëndetit mendor.
Hetimet vijojnë për të zbardhur të gjithë dinamikën e ngjarjeve dhe për të përcaktuar rolin e secilit person të përfshirë.