Valët e forta të të nxehtit që goditën Evropën dhe Mbretërinë e Bashkuar gjatë muajve maj dhe qershor po konsiderohen nga shkencëtarët si një sinjal i qartë i përshpejtimit të ndryshimeve klimatike.
Sipas një analize të BBC, temperaturat rekord të regjistruara këtë vit tregojnë se kontinenti po hyn në një fazë ku verat ekstreme po bëhen gjithnjë e më të zakonshme.
Gjatë qershorit, shumë vende evropiane thyen rekordet historike të temperaturave për këtë periudhë, ndërsa në disa zona u regjistruan mbi 40°C. Në Mbretërinë e Bashkuar, temperatura arriti në 37.7°C, duke tejkaluar rekorde që kishin qëndruar për dekada.
Ekspertët shpjegojnë se ndryshimet klimatike të shkaktuara nga aktiviteti njerëzor po e bëjnë nxehtësinë më të shpeshtë, më intensive dhe më të zgjatur. Një shqetësim shtesë është edhe rritja e temperaturave gjatë natës, që vështirëson rikuperimin e organizmit.
Shkencëtarët theksojnë se Evropa është kontinenti që po ngrohet më shpejt në botë. Shkrirja e akullnajave, ndryshimet në cilësinë e ajrit dhe ngrohja e deteve po përforcojnë më tej këtë fenomen.
Temperaturat e larta të ujërave përreth Evropës pritet të ndikojnë në valët e ardhshme të të nxehtit, pasi detet e ngrohta ruajnë energjinë termike dhe dobësojnë efektin ftohës të erërave.
Sipas ekspertëve, nëse nuk reduktohen emetimet globale të gazeve serrë, valët e të nxehtit do të bëhen më të shpeshta dhe më të forta. Edhe pse jo çdo vit do të jetë më i nxehtë se tjetri, tendenca afatgjatë mbetet e qartë: temperaturat mesatare në Evropë do të vazhdojnë të rriten.