Një avion i JetBlue Airways ka raportuar se është përplasur me një dron gjatë afrimit për ulje në aeroportin ndërkombëtar John F. Kennedy në Nju Jork, sipas autoriteteve amerikane.
Administrata Federale e Aviacionit (FAA) bëri të ditur se avioni u ul në mënyrë të sigurt dhe një inspektim pas fluturimit nuk konstatoi dëmtime apo prova për përplasje strukturore. Megjithatë, për incidentin është hapur një hetim zyrtar.
Sipas të dhënave paraprake, piloti ka raportuar se përplasja ka ndodhur në një lartësi prej rreth 900 metrash, rreth orës 07:15 të mëngjesit.
Në komunikimet e regjistruara me kontrollin ajror, piloti dëgjohet duke thënë se avioni ishte në fazën e fundit të uljes kur ndodhi incidenti.
“U përplasëm me një dron gjatë kthesës,” thuhet në komunikimin e pilotit, i cili më pas konfirmon se objekti kishte goditur pjesën e përparme të avionit.
Në një deklaratë për mediat, JetBlue sqaroi se pasagjerët zbritën normalisht pas uljes dhe avioni u tërhoq për inspektim, i cili nuk gjeti dëme të dukshme.
Rritja e incidenteve me dronë pranë aeroporteve
FAA thekson se rastet e tilla janë në rritje, duke raportuar më shumë se 100 sinjalizime mujore për dronë pranë aeroporteve në SHBA, pavarësisht ndalimeve të rrepta për përdorimin e tyre në këto zona.
Vetëm pak ditë para këtij incidenti, një pilot i United Airlines raportoi një tjetër situatë të rrezikshme pranë aeroportit Newark Liberty në Nju Xhersi, ku një dron u pa shumë pranë avionit gjatë afrimit për ulje.
Autoritetet paralajmërojnë se operimi i dronëve në afërsi të aeroporteve mund të sjellë gjoba të rënda dhe ndjekje penale, përfshirë edhe dënim me burg në raste të rrezikimit të sigurisë ajrore.