Gjermania dhe Danimarka po përjetojnë temperatura rekord, ndërsa vala e të nxehtit që ka përfshirë Evropën është zhvendosur gradualisht drejt lindjes, duke sjellë kushte ekstreme klimatike nga Skandinavia deri në Alpet Evropiane.
Sipas raportimeve të Reuters, në disa zona temperaturat kanë kaluar kufirin e 40°C, ndërsa Danimarka ka regjistruar vlera historike, më të lartat që nga fillimi i matjeve meteorologjike.
Edhe vende të tjera si Britania e Madhe, Franca, Zvicra dhe Gjermania kanë shënuar rekorde të reja për muajin qershor, përpara se sistemi i nxehtë të zhvendosej drejt Polonisë.
Në Gjermani është regjistruar një rekord i ri kombëtar prej 41,3°C pranë Saarbrücken, ndërsa në Danimarkë temperaturat kanë arritur deri në 37°C në veri të Aarhusit, niveli më i lartë i regjistruar që nga viti 1874.
Autoritetet gjermane kanë lëshuar paralajmërime ekstreme për pjesën më të madhe të vendit dhe kanë bërë thirrje për kursim të ujit, ndërsa temperaturat pritet të arrijnë deri në 42°C në disa rajone.
Ndikime të forta janë raportuar edhe në infrastrukturë, me ndërprerje të transportit hekurudhor, dëmtime në rrugë dhe kufizime në aktivitete publike në disa vende evropiane.
Në Francë, vala e të nxehtit ka shkaktuar viktima dhe rritje të shtrimeve në spitale, ndërsa në Itali janë shpallur alarme të kuqe në 18 qytete, përfshirë Milano, Romë dhe Firence.
Ekspertët meteorologjikë theksojnë se fenomeni është intensifikuar nga ndryshimet klimatike të shkaktuara nga njeriu, ndërsa vala e të nxehtit lidhet me të ashtuquajturin “bllokim Omega”, që ka mbajtur masa ajri të nxehtë të ngujuara mbi Evropë.
Autoritetet paralajmërojnë se, pavarësisht dobësimit gradual të valës në fundjavë, pasojat në shëndetësi dhe infrastrukturë do të vijojnë edhe në ditët në vijim.