Seanca gjyqësore në GJKKO për kreun e Partia e Lirisë, Ilir Meta, dhe ish-deputeten Monika Kryemadhi është shoqëruar me tensione dhe përplasje verbale mes ish-bashkëshortëve.
Debati nisi pasi Meta deklaroi në sallën e gjyqit se nuk kishte dijeni për veprimet apo komunikimet e Kryemadhit me persona të përmendur në dosje, duke theksuar se çdo çështje që lidhet me mesazhet duhet të sqarohet nga vetë ajo.
“Nuk ekziston asnjëlloj ndikimi për Adrian Shatkun. As për askënd tjetër. Asnjë SMS për Monika Kryemadhin, Piro Xhixhon. Edhe një interes që mund të ishte i ligjshëm. Kjo është histori UDB-je, edhe Adrian Shatku duhet të kishte ardhur këtu sapo dëgjoi emrin, se ka ngrënë bukë në shtëpinë time. Adrian Shatku u largua në 1989, e mori UDB-ja, pastaj iku në Amerikë. Kjo është histori UDB-je dhe agjenturash greke. Nuk kam asnjë dijeni për veprimet e Monika Kryemadhit, i di vetë ajo. Ato historitë e mesazheve i di zonja Kryemadhi,” deklaroi ai.
Nga ana e saj, Kryemadhi reagoi ashpër ndaj deklaratave të Metës, duke e akuzuar se po mbështetet në thashetheme dhe informacione të sjella nga persona të tjerë. Në replika e sipër, ajo përmendi edhe emrin e Tedi Blushi, duke e bërë atë pjesë të debatit në sallë.
“Boll se nuk është ashtu. Me llafet që të sjell Altin Dumani, thashetheme flet këtu. Mos u merr me llafe grash. Akoma merresh me thashethemet e Tedi Blushit?”, tha ish-deputetja.
Tensionet u rritën më tej kur Kryemadhi deklaroi se prej katër vitesh ka duruar situata të ngjashme dhe paralajmëroi se do të bëjë publike komunikime që, sipas saj, lidhen me personat e përmendur në debat.
“Kam 4 vjet që e dëgjoj dhe e duroj. Edhe babai im të çohet nga varri, nuk e duroj dot më. Do të t’i lexoj dhe unë mesazhet ty, të marrësh vesh. Me llafet e këtij rrogëtari merresh ti?”,tha Kryemadhi drejtuar Blushit.
Për shkak të toneve të larta dhe ndërprerjeve të vazhdueshme, trupa gjykuese ndërhyri duke paralajmëruar palët që të respektojnë rregullat e seancës. Gjykata i tërhoqi vëmendjen Kryemadhit se, në rast të përsëritjes së sjelljeve që cenojnë rendin e procesit, mund të largohet nga salla dhe të përballet me masa administrative.
Seanca vijon me shqyrtimin e çështjes në themel, ndërsa përplasjet mes protagonistëve kanë tërhequr vëmendjen e opinionit publik dhe mediave.