Qeveria shqiptare dhe kompania italiane e energjisë Eni S.p.A. kanë nënshkruar në Tiranë një memorandum mirëkuptimi për studimin e fizibilitetit të krijimit të një operatori të ri kombëtar në fushën e hidrokarbureve, me synim forcimin e sigurisë së furnizimit dhe krijimin e rezervës strategjike të naftës.
Në ceremoninë e nënshkrimit, kryeministri Edi Rama e vlerësoi projektin si një hap të rëndësishëm strategjik për ekonominë dhe sigurinë energjetike të vendit.
“Kujtoj se kohë parë, me fillimet e këtij mandati të ri, kemi ndarë me publikun ambicien për të krijuar një forcë të re në tregun e hidrokarbureve, një operator modern dhe dinamik i cili bën në njëfarë mënyre edhe rolin e një rregullatori të tregut në funksion të mundësive më të mira për konsumatorët”, tha Rama.
Ai shtoi se zhvillimet dhe krizat e fundit kanë treguar nevojën për forcimin e rezervave strategjike të naftës.
“Rrugës u shfaq një krizë shumë domethënëse që përsëri vuri në diskutim çështjen e rezervave strategjike të naftës. Rezervat strategjike të naftës ne i kemi të rregulluara në një kuadër ligjor që me ligjin e ri të çuar përpara nga Ministria e Infrastrukturës dhe Energjisë bëhet një kuadër i plotë”, u shpreh ai.
Duke theksuar rëndësinë e partneritetit me Italinë, Rama veçoi rolin e kompanisë partnere në projekt.
“Ne iu qasëm ‘Enit’ për bashkëpunim strategjik në krijimin e këtij operatori të ri, i cili do të marrë përsipër edhe garantimin e rezervës strategjike të naftës”, tha ai.
Sipas kryeministrit, projekti do të garantojë stabilitet afatgjatë në furnizimin me energji.
“Përmes këtij partneriteti, Shqipëria nuk do të ketë më asnjë dilemë për çfarëdo krize që vjen përpara në aspektin e rezervës strategjike”, deklaroi Rama.
Ai shtoi gjithashtu se operatori i ri synon të shndërrohet në një strukturë moderne me rol edhe rajonal.
“Kompania është një risi, por duke pasur parasysh bazën shumë solide të vetë ‘Enit’ dhe dijen e ekipit të saj drejtues, ajo ka mundësi të bëhet një model i ri i qasjes ndaj tregut jo vetëm kombëtar, por edhe rajonal të hidrokarbureve”, u shpreh kryeministri.
Rama nënvizoi se procesi është në fazën e parë dhe do të vijojë me hapa të mëtejshëm konkretë.
“Jemi sot shumë të inkurajuar dhe mirënjohës për gatishmërinë e treguar nga një gjigant global si ‘Eni’ për të bashkëpunuar dhe krijuar këtë startup në fushën e hidrokarbureve së bashku me ne. Me firmosjen e këtij memorandumi hapim rrugën që pa hyrë gushti të rikthehemi këtu për të deklaruar regjistrimin e kësaj kompanie të re”, tha ai.
Sipas qeverisë, ky projekt pritet të forcojë ndjeshëm rolin e Shqipërisë në tregun energjetik dhe të rrisë sigurinë e furnizimit për konsumatorët dhe ekonominë në tërësi.