Kryeministri Edi Rama ka reaguar nga Fier ndaj protestuesve që e kanë quajtur “tradhtar”, duke i kundërshtuar akuzat dhe duke folur për qëndrimet e tij në politikën e jashtme dhe zhvillimet në vend.
Rama u ndal edhe te çështja e Sazani, duke sqaruar modelin e zhvillimit dhe marrëdhëniet me investitorët, si dhe rolin e shtetit në projektet strategjike.
“E vërteta është që Sazani ka qenë, është dhe do të mbetet tokë e Republikës së Shqipërisë… ne përfaqësojmë Republikën e Shqipërisë dhe pronën shtetërore”, u shpreh ai, duke theksuar se ende po zhvillohen negociata për formulën e investimeve.
Duke iu përgjigjur kritikave për “tradhti”, Rama tha se gjatë një vizite në Serbia kishte deklaruar qartë qëndrimin e Shqipërisë për Kosovën.
“Atyre që më thonë mua tradhtar, më thanë pse nuk shkon në Serbi, në Serbi vajta unë… jua thashë atyre në sy nga pallati ku rri presidenti që Kosova është Republikë e pavarur dhe është një histori që nuk kthehet më mbrapa”, tha Rama.
Ai shtoi gjithashtu se është e lehtë, sipas tij, të bëhesh “hero” në protesta, ndërsa theksoi se ndryshimet në vend janë bërë nga qeverisja aktuale dhe Partia Socialiste.
“Patriotizmi dhe tradhtia nuk janë më vetëm të varur flamurin… patriotizëm nuk është thjesht simbolikë”, u shpreh kryeministri në deklaratën e tij.