Sipas raportimeve të fundit nga gazetari i merkatos Fabrizio Romano dhe burimeve pranë klubit, largimi i Igli Tare nga AC Milan në fund të sezonit duket gjithnjë e më i mundshëm.
Raportet mes Tares dhe drejtuesve të klubit thuhet se janë tensionuar prej muajsh, ndërsa rezultatet zhgënjyese të Milanit dhe disa zgjedhje në merkato kanë ndikuar në këtë situatë. Mediat italiane raportojnë se klubi po mendon për një ristrukturim të thellë në nivel drejtues dhe teknik.
Një nga emrat që përmendet si zëvendësues i mundshëm i Tares është Tony D’Amico, aktualisht pjesë e Atalanta BC.
Në të njëjtën kohë, edhe e ardhmja e trajnerit Massimiliano Allegri mbetet e paqartë. Sipas raportimeve, drejtuesit e Milanit do të marrin vendime përfundimtare vetëm pas mbylljes së sezonit dhe analizës së objektivave sportive, veçanërisht kualifikimit në Champions League.