Vedat Muriqi ka reaguar në mënyrën më të mirë pas zhgënjimit me Kosovën, duke u kthyer protagonist absolut me Mallorcën në La Liga. Sulmuesi shqiptar ndëshkoi Realin e Madridit me golin e fitores 2-1 në javën e 30-të, duke i dhënë skuadrës së tij tre pikë të arta në garën për mbijetesë.
Mallorca kaloi në avantazh në minutën e 41-të me Manu Morlanes, duke e mbyllur pjesën e parë në shifrat 1-0. Në fraksionin e dytë, madrilenët arritën të reagojnë vetëm në minutën e 88-të, kur Eder Militao barazoi rezultatin në 1-1, në rikthimin e tij pas muajsh mungese për shkak dëmtimi.
Kur gjithçka dukej se do të mbyllej në barazim, në minutat shtesë doli në skenë Vedat Muriqi, i cili shënoi golin e triumfit dhe shpërtheu festën e Mallorcës. Me këtë realizim, bomberi kosovar shkon në kuotën e 19 golave këtë sezon, duke iu afruar edhe më shumë Kylian Mbappé në renditjen e golashënuesve.
Për Mallorcën kjo fitore vlen shumë, pasi ngjitet në 31 pikë dhe merr frymë në luftën për mbijetesë, ndërsa për Realin e Madridit humbja është një goditje e rëndë në garën për titull, me “Los Blancos” që mbeten në 69 pikë.