Një ortek masiv u regjistrua pasditen e djeshme në zonën e Valbonës, në Alpet e Tropojës, duke krijuar pamje dramatike dhe mbresëlënëse. Pamjet e kapura nga Klubi Alpin Prishtina tregojnë dëborën që zbret me shpejtësi drejt luginës.
Fatmirësisht, ngjarja ndodhi në një zonë të pashtruar me banesa, duke shmangur dëmtimet materiale dhe tragjeditë njerëzore. Masa e madhe e dëborës u përhap në një sipërfaqe të gjerë, duke treguar fuqinë e natyrës në këtë rajon malor.
Kryebashkiaku i Tropojës, Rexhë Byberi, publikoi videon dhe bëri thirrje për kujdes maksimal nga vizitorët dhe banorët e zonës:
“Reshjet e fundit të borës kanë rritur rrezikun e orteqeve. Kërkohet kujdes maksimal nga të gjithë vizitorët. Informohuni nga guida lokale. Shmangni zonat e rrezikuara. Respektoni udhëzimet e banorëve dhe autoriteteve. Pronarët e bujtinave të informojnë vizitorët për rreziqet aktuale. Siguria mbi gjithçka.”
Autoritetet e turizmit dhe ato lokale paralajmërojnë se rreziku i orteqeve mbetet i lartë, ndaj shtigjet malore duhet të përdoren vetëm me kujdes dhe pas informimit të duhur.