Presidenti amerikan, Donald Trump, shprehu pakënaqësinë e tij në komunikimet me delegacionin iranian gjatë negociatave për programin bërthamor.
Duke folur me gazetarët para udhëtimit të tij në Teksas, Trump theksoi se do të ketë “më shumë bisedime të premten” dhe se ende synon të arrijë një marrëveshje.
“Irani nuk mund të ketë armë bërthamore. Nuk jam i kënaqur me ta, por priten bisedime të mëtejshme të premten. Dua të bëj një marrëveshje me ta,” u shpreh presidenti.
Bisedimet mbi programin bërthamor të Teheranit vazhduan këtë javë, ndërsa SHBA ka dërguar përforcime të mëdha ushtarake në rajon. Trump theksoi se nuk dëshiron të përdorë forcë ushtarake, por nuk përjashtoi nevojën e mundshme për ndërhyrje në raste ekstreme.
Omani, që po ndërmjetëson bisedimet, dërgoi sot ministrin e tij të jashtëm në Uashington për diskutime mbi çështjen me zëvendëspresidentin e SHBA-së, J.D. Vance, sipas një burimi të njohur me negociatat.