Që nga 1 janari 2026, paga minimale në Shqipëri është rritur nga 40,000 në 50,000 lekë në muaj. Megjithatë, kjo masë ka një efekt të papritur për punonjësit me paga bruto mbi 176,416 lekë në muaj. Paga e tyre neto do të ulet për shkak të rritjes së tavanit të kontributeve të sigurimeve shoqërore dhe shëndetësore.
Në praktikë, çdo punonjës me pagë bruto mbi 186,416 lekë do të paguajë më shumë kontribute, pa përfituar ndonjë rritje reale në pagën bruto. Për shembull, kontributet mujore të sigurimeve shoqërore do të rriten nga rreth 16,760 lekë në 17,709 lekë, duke sjellë një kosto shtesë prej afërsisht 950 lekësh në muaj për secilin punonjës në këtë nivel dhe mbi të.
Ky ndryshim ndikon edhe tek punëdhënësit, të cilët gjithashtu do të paguajnë më shumë për kontributet, duke rritur koston totale të punës. Sipas të dhënave të administratës tatimore, politika e re pritet të sjellë rreth 9 miliardë lekë të ardhura shtesë për arkat e sigurimeve shoqërore dhe shëndetësore, ku 7.6 miliardë lekë do të vijnë nga sigurimet shoqërore dhe 1.4 miliardë lekë nga sigurimet shëndetësore.
Në total, për vitin 2026, të ardhurat nga kontributet parashikohen të arrijnë 197 miliardë lekë, 11.4% më shumë se pritshmëritë për vitin 2025. Megjithatë, për mijëra punonjës me paga mesatare dhe të larta, kjo do të përkthehet në një ulje të drejtpërdrejtë të pagës neto dhe një barrë fiskale më të madhe, duke rritur koston e punës për bizneset dhe duke ulur të ardhurat reale mujore të këtij segmenti.