Që në orët e para të së premtes (19 dhjetor), fermerët francezë janë mbledhur jashtë rezidencës së pushimeve buzë detit të çiftit Macron në Le Touquet, duke organizuar një protestë simbolike me traktorë, banderola dhe një arkivol – si shenjë e asaj që ata e quajnë “vdekja e bujqësisë”.
“Hani ushqim francez” dhe “Ndaloni taksat” ishin disa nga sloganet e vendosura përpara vilës, e cila ruhej nga forcat e sigurisë. Protestuesit hodhën karroca të tëra me lakra dhe goma jashtë rezidencës së Emmanuel Macron, në kuadër të aksionit të tyre.
Pakënaqësia u përshkallëzua pas njoftimit të Ursula von der Leyen, e cila të enjten në mbrëmje bëri të ditur shtyrjen e nënshkrimit të marrëveshjes BE–Mercosur për në janar. Konfederata e shoqatave të fermerëve FNSEA e cilësoi këtë vendim si “të pamjaftueshëm” dhe u bëri thirrje anëtarëve të saj të vijojnë protestat.
Prej disa ditësh, qindra fermerë dhe prodhues – veçanërisht në jugperëndim të Francës – kanë organizuar bllokada rrugësh, demonstrata dhe madje kanë udhëtuar drejt Brukselit për të shprehur kundërshtimin e tyre.
Sipas tyre, zemërimi lidhet si me mënyrën se si autoritetet franceze po menaxhojnë epideminë e sëmundjes së lëkurës nodulare (LND), ashtu edhe me pasojat që marrëveshja e tregtisë së lirë me Mercosur mund të ketë për prodhimin vendas.
“Presidenti po lufton për bujqësinë dhe fermerët francezë”, deklaroi një bashkëpunëtor i Macron për BFMTV të premten në mëngjes.