Qeveria po përgatit paketën e re fiskale që pritet të hyjë në fuqi më 1 janar 2026, me disa ndryshime të rëndësishme që prekin fermerët, ndërtesat publike dhe të vetëpunësuarit.
Projektet për ndërtimin e shkollave, spitaleve dhe godinave të tjera publike do të përjashtohen nga taksa e ndikimit në infrastrukturë, duke ulur koston e realizimit të tyre.
Për prodhuesit bujqësorë, qeveria propozon vendosjen e një norme kompensimi prej 10% mbi vlerën totale të produkteve dhe shërbimeve të shitura gjashtëmujorisht. Pagesa e kompensimit do të kryhet nga Tatimet brenda 30 ditëve nga paraqitja e kërkesës, me qëllim mbështetjen e fermerëve dhe reduktimin e pabarazive në zinxhirin e furnizimit bujqësor.
Drafti i paketës parashikon krijimin e një mekanizmi për identifikimin e rasteve të shmangies tatimore. Individët që ofrojnë shërbime si të vetëpunësuar, por në praktikë punojnë në kushte të ngjashme me punëmarrësit, do të trajtohen si të punësuar dhe do të tatohet sipas këtij statusi.
Për këtë qëllim, do të krijohet një “Deklaratë e Statusit të të Vetëpunësuarit”, që do të dorëzohet bashkë me deklaratën tatimore vjetore.