Një automjet luksoz tip “Ferrari” me vlerë marramendëse prej rreth 600 mijë eurosh ka rënë në duart e Policisë së Tiranës, si pjesë e operacionit të koduar “Red”, i zhvilluar nga strukturat e posaçme kundër pastrimit të parave.
Sipas të dhënave zyrtare, makina i përkiste shtetasit E. V., 30 vjeç, i cili më herët është dënuar në Turqi për trafikim të lëndëve narkotike. Për të shmangur hetimet dhe gjurmimin e burimit të pasurisë, ai e kishte regjistruar mjetin në emër të një personi tjetër. Hetuesit zbuluan gjithashtu se automjeti ishte sjellë në Shqipëri nga një i tretë, po për llogari të të njëjtit shtetas.
Operacioni u zhvillua në rrugën “Abdyl Frashëri”, ku policia ndaloi “Ferrari”-n e kuq që po drejtohej pikërisht nga i dyshuari. Mjeti u sekuestrua menjëherë, ndërsa në hetim u përfshinë edhe dy shtetas të tjerë të lidhur me këtë skemë.
Autoritetet theksojnë se kjo është vetëm një pjesë e zinxhirit të hetimeve që kanë si objektiv gjurmimin dhe sekuestrimin e pasurive të përfituara nga aktiviteti kriminal jashtë vendit. Aktualisht, të tre personat – E. V., S. Ll. (36 vjeç) dhe A. L. (30 vjeç) – janë nën procedim penal, ndërsa hetimet po zgjerojnë rrethin për të identifikuar dhe konfiskuar pasuri të tjera të dyshuara.
Materialet janë referuar tashmë në Prokurorinë e Tiranës, që do të drejtojë fazën e mëtejshme të procedimit.