Grupi i këshilltarëve të Partisë Socialiste në Këshillin Bashkiak të Tiranës ka dorëzuar një kërkesë zyrtare për shkarkimin e kryetarit të Bashkisë, Erion Veliaj.
Në relacionin e paraqitur theksohet se, prej datës 10 shkurt 2025, kryeqyteti ndodhet pa një drejtues të zgjedhur për shkak të proceseve penale ndaj Veliajt, duke krijuar, sipas këshilltarëve, një boshllëk në drejtimin institucional të bashkisë.
Dokumenti argumenton se situata aktuale e bën të domosdoshme nisjen e procedurave ligjore për emërimin e një kryetari në detyrë, deri në një vendim përfundimtar mbi pozitën e Veliajt. Në këtë kontekst, theksohet se “Tirana ka nevojë për një drejtues funksional dhe aktiv, në përputhje me ligjin dhe përgjegjësinë morale që i takon Këshillit”.
Kërkesa e këshilltarëve socialistë mbështetet në nenet përkatëse të Ligjit nr. 139/2015 “Për Vetëqeverisjen Vendore”, i cili parashikon shkarkimin e kryebashkiakut nëse mungon në detyrë për një periudhë më shumë se tre muaj rresht.
