Në një moment të rrallë, presidenti rus Vladimir Putin është kapur duke biseduar për mundësinë e pavdekësisë me liderin kinez Xi Jinping dhe atë të Koresë së Veriut, Kim Jong Un, gjatë samitit të mbajtur në Pekin për 80-vjetorin e përfundimit të Luftës së Dytë Botërore.
Dy liderët 72-vjeçarë, Putin dhe Xi, u dëgjuan duke folur për transplantime organesh dhe procedura mjekësore të avancuara që, sipas tyre, mund të zgjasin jetën njerëzore përtej kufijve aktualë.
Xi u shpreh se “në moshën 70 vjeç sot je ende fëmijë”, ndërsa Putin shtoi: “Organet mund të transplantohen pafundësisht… sa më gjatë të jetosh, aq më i ri bëhesh. Mund të arrish edhe pavdekësinë”.
Në të njëjtën bisedë, Xi përmendi parashikime që këtë shekull jeta e njeriut mund të shkojë deri në 150 vjet.
Kjo bisedë vjen mes akuzave të rënda ndaj Pekinit për tregti të paligjshme organesh nga minoritetet, si dhe mes përpjekjeve të Rusisë për të gjetur kura kundër plakjes përmes urdhrit të drejtpërdrejtë të qeverisë ndaj instituteve kërkimore.