Në Durrës ka vijuar sot aksioni për lirimin e hapësirave publike nga subjektet që kishin zaptuar trotuaret dhe ambientet që i përkasin komunitetit.
Kryeministri Edi Rama publikoi pamje nga operacioni, duke e shoqëruar me mesazhin e shkurtër: “Durrës, vazhdojmë”.
Qeveria e konsideron këtë nismë të domosdoshme për të rritur cilësinë e shërbimeve dhe funksionalitetin e bizneseve në përputhje me standardet kombëtare të mikpritjes dhe shërbimit, jo vetëm në zonat turistike, por në çdo qytet të vendit.
Rama bëri me dije se po hartohet një Rregullore Kombëtare, e cila do të përcaktojë qartë se cilat hapësira publike mund të shfrytëzohen nga bizneset.
Aksioni, i nisur në fillim të korrikut, është pjesë e programit “Rilindja Urbane 2.0” dhe pritet të mbetet një prioritet i pushtetit vendor e qendror në funksion të mbrojtjes së hapësirave publike dhe cilësisë së jetës në komunitet.