Kryeministri Edi Rama deklaroi sot se procesi i lirimit të hapësirave publike nuk duhet parë si një aksion i përkohshëm, por si faza e parë e një transformimi të ri urban në vend.
Ai ndau pamje nga ndërhyrjet e kryera në qytete të ndryshme, duke theksuar se synimi është të krijohen hapësira më të pastra, më të gjelbra dhe me njësi shërbimi që bashkëpunojnë e lidhen më ngushtë me komunitetin.
“Ky nuk është aksion, por faza e parë e një transformimi të ri për Tiranën dhe për qytete të tjera, ku hapësirat publike të jenë më të pastra, më të gjelbra dhe me shërbime më miqësore për njerëzit”, u shpreh Rama në një postim në rrjetet sociale.
Procesi i lirimit të hapësirave publike, që prej fillimit të korrikut, ka synuar të largojë subjektet që kanë zaptuar trotuaret dhe ambientet e dedikuara për qytetarët. Kryeministri paralajmëroi gjithashtu hartimin e një Rregulloreje Kombëtare, që do të përcaktojë me ligj hapësirat që bizneset mund të përdorin.
Sipas tij, ky transformim është i domosdoshëm jo vetëm për të rritur cilësinë e shërbimit dhe mikpritjes, por edhe për të garantuar funksionalitetin e bizneseve në çdo cep të Shqipërisë, përtej zonave turistike.