Mijëra qytetarë nga mbarë Kosova dhe rajoni protestuan sot në Prishtinë kundër, siç e quajtën, “padrejtësive” të Gjykatës Speciale në Hagë ndaj ish-krerëve të Ushtrisë Çlirimtare të Kosovës.
Protesta u organizua nga organizata të dala nga lufta, të cilat akuzuan Dhomat e Specializuara për qasje të njëanshme dhe drejtësi selektive që, sipas tyre, përpiqet të zhvendosë fajin nga pushtuesit te çlirimtarët. Pjesëmarrësit kërkuan drejtësi të barabartë dhe respektim të të drejtave të të akuzuarve.
Katër ish-krerët e UÇK-së – Hashim Thaçi, Kadri Veseli, Rexhep Selimi dhe Jakup Krasniqi – ndodhen në paraburgim që prej vitit 2020, ndërsa procesi gjyqësor nisi në prill 2023. Prokuroria ka paraqitur mbi 3,000 prova dhe ka thirrur 125 dëshmitarë. Tani pritet që mbrojtja të fillojë paraqitjen e provave në fund të gushtit.
Gjykata Speciale u themelua nga Kuvendi i Kosovës në vitin 2015 dhe heton krimet e pretenduara të UÇK-së ndaj pakicave dhe kundërshtarëve politikë në periudhën 1998–2000. Ajo financohet kryesisht nga BE-ja dhe vepron me staf ndërkombëtar në Hagë.