Khaby Lame, ylli më i madh i TikTok-ut me mbi 162 milionë ndjekës, është larguar nga SHBA pas një ndalimi të shkurtër nga autoritetet e emigracionit në Las Vegas për shkak të qëndrimit të tejzgjatur përtej afatit të vizës.
Lame, i lindur në Senegal dhe me shtetësi italiane, kishte hyrë në SHBA më 30 prill, por më 6 qershor u ndalua nga agjentët e Imigracionit dhe Doganave (ICE) në Aeroportin Ndërkombëtar Harry Reid, pasi kishte tejkaluar qëndrimin e lejuar.
Ai u lirua po atë ditë dhe iu dha mundësia të largohej vullnetarisht nga vendi, duke shmangur një urdhër dëbimi që do të ndërlikonte hyrjet e tij të ardhshme në SHBA.
Ngjarja ndodhi në një klimë të tensionuar politike për emigracionin, ndërsa administrata Trump po forcon kontrollet dhe po zhvillon operacione të mëdha në disa qytete të mëdha amerikane.
Khaby Lame u bë një fenomen global gjatë pandemisë, duke fituar zemrat e publikut me videot e tij pa fjalë që ironizonin “life hacks” absurde. Ai është gjithashtu ambasador i UNICEF-it dhe ka bashkëpunuar me marka të mëdha si Hugo Boss.
Lame nuk ka komentuar publikisht mbi incidentin, por përfaqësuesit e tij kanë konfirmuar se ai tashmë është kthyer në Evropë.