Kodi i Punës në Shqipëri parashikon një javë pune prej 40 orësh, të ndarë në pesë ditë pune nga 8 orë. Megjithatë, sipas të dhënave të INSTAT, 78% e të punësuarve në Shqipëri punojnë më shumë se këto orë. Nga këta, 59.4% punojnë 40-48 orë në javë, ndërsa 19.3% punojnë mbi 49 orë. Shifrat tregojnë se meshkujt janë më të prirur të punojnë jashtë orarit, me 24.2% të tyre që punojnë mbi 49 orë në javë, krahasuar me 13.6% të femrave.
Dy faktorë kryesorë që ndikojnë në orët e larta të punës janë puna gjatë fundjavave dhe numri i lartë i të vetëpunësuarve. Sipas Anketës së Forcës së Punës, në tremujorin e fundit të vitit 2023, të vetëpunësuarit përbënin rreth 30% të punësimit total.
Sipas “Scan Intel”, një i punësuar në Shqipëri punon mesatarisht 42 orë në javë. Sektori me orët më të gjata të punës është “Tregti, Transport, Hoteleri, Shërbime të biznesit dhe administrative” me 46.6 orë në javë, ndjekur nga ndërtimi me 45.1 orë. Punonjësit e administratës kalojnë më pak orë në punë, mesatarisht 40.3 orë në javë.
Gjatë periudhës 2022-2023, orët e punës u rritën më shumë në sektorin e bujqësisë, ku të punësuarit shpenzuan 36.4 orë në javë, një rritje prej 0.5% nga viti 2022. Industria nxjerrëse gjithashtu pa një rritje në orët e punës, nga 42.7 në 42.9 orë në javë. Në sektorë si prodhimi dhe administrata, orët e punës u ulën përkatësisht me 0.4% dhe 0.2%.