Rreth 6 mijë pjesëtarë të forcave të armatosura dhe shërbimeve të sigurisë në Itali kanë dalë në protestë në Romë, duke kërkuar rritje pagash, përmirësim të kushteve të pensionit dhe mbrojtje më të forta në vendin e punës.
Demonstrata mblodhi për herë të parë në një tubim të përbashkët përfaqësues të Ushtrisë, Marinës, Forcave Ajrore, Karabinierëve dhe Guardia di Finanza, të organizuar nga sindikatat kryesore të sektorit të mbrojtjes dhe sigurisë.
Protesta u zhvillua pak ditë pasi qeveria italiane rinovoi marrëveshjen kolektive për rreth 430 mijë punonjës të forcave të armatosura dhe sigurisë. Marrëveshja parashikon një rritje bruto mujore page prej 188 eurosh dhe një pagesë të njëhershme prej 2 mijë e 448 eurosh, si dhe hapjen e diskutimeve për reformën e pensioneve.
Megjithatë, disa sindikata, mes tyre Sinafi, Sindikata e Re e Karabinierëve, Usami Aeronautica, Itamil dhe Silmm, refuzuan ta firmosnin marrëveshjen, duke argumentuar se masat nuk janë të mjaftueshme për të përballuar shqetësimet e efektivëve për pagat dhe pensionet.
Protestuesit marshuan në rrugët e Romës nën sloganin: “Çdo ditë i shërbejmë Italisë. Sot kërkojmë respekt”.
Sindikatat paraqitën katër kërkesa kryesore: reformimin e sistemit të pensioneve, ndalimin e rritjes së moshës së daljes në pension në 65 vjeç, mbrojtje më të madhe ligjore për personelin e sigurisë, rritje pagash në përputhje me koston e jetesës dhe investime më të mëdha në rekrutim, trajnim dhe modernizimin e sektorit.
Tubimi u mbyll me një konferencë mbi të ardhmen e shërbimeve të sigurisë, mbrojtjes dhe emergjencës në Itali.