Panairi i Punës dhe Aftësive, i organizuar në Pallatin e Kongreseve nga Agjencia Kombëtare e Punësimit, ka sjellë rreth 2000 vende të lira pune për punëkërkuesit. Në këtë aktivitet marrin pjesë 80 biznese, të cilat ofrojnë paga konkurruese, me një mesatare mbi 1000 euro në muaj.
Ofertat e punës përfshijnë një gamë të gjerë sektorësh, duke nisur nga teknologjia, ndërtimi dhe kontabiliteti, deri te pasuritë e paluajtshme dhe profesionet praktike që nuk kërkojnë diplomë universitare, si estetika apo shërbimet në hoteleri-turizëm. Sipas përfaqësuesve të institucionit, kërkesa më e lartë aktualisht është në sektorin e shërbimeve, e ndikuar nga rritja e turizmit në vend.
Përveç punësimit, panairi ofron edhe mundësi për formim profesional përmes shkollave publike, ku vihet re një interes në rritje për degë si hidraulika, mekanika dhe teknologjia e informacionit.
Autoritetet synojnë që gjithnjë e më shumë të rinj të orientohen drejt arsimit profesional, me objektivin që 1 në 3 nxënës të arsimit të mesëm të ndjekë këtë drejtim. Aktualisht, pjesëmarrja ka arritur në rreth 19% të totalit, ose afërsisht 16 mijë nxënës.
Ndërkohë, qytetarët e papunë mund të regjistrohen si punëkërkues përmes platformës e-Albania dhe të konsultojnë ofertat në portalin zyrtar të punësimit. Për të rinjtë deri në 29 vjeç ekziston edhe programi i “Garancisë Rinore”, i cili synon integrimin e tyre në tregun e punës brenda katër muajve.