Gjykata e Posaçme kundër Korrupsionit dhe Krimit të Organizuar ka shpallur vendimin për Nikolin Nikën, i akuzuar për korrupsion aktiv ndaj funksionarëve të drejtësisë.
Në vendimin Nr. 39, trupi gjykues i përbërë nga gjyqtaret Flojera Davidhi, Elsa Ulliri dhe Rudina Palloj, miratoi marrëveshjen e fajësisë mes Prokurorisë dhe të pandehurit, duke e shpallur Nikën fajtor për veprën penale të parashikuar në nenin 319 të Kodit Penal.
Ai u dënua me 1 vit burg, por Gjykata vendosi pezullimin e ekzekutimit të dënimit për një periudhë prove prej dy vitesh, gjatë së cilës i pandehuri nuk duhet të kryejë asnjë vepër penale dhe duhet të qëndrojë në kontakt të vazhdueshëm me Drejtorinë e Shërbimit të Provës në Lezhë.
Gjithashtu, Gjykata urdhëroi që Nikolin Nika të mos ketë kontakte me persona të dënuar dhe të paguajë të gjitha shpenzimet procedurale të hetimit dhe gjykimit.